У сувязі са святкаваннем 100-гадовага юбілею з дня заснавання органаў загса Рэспублікі Беларусь аддзелам загса Маларыцкага райвыканкама сумесна з грамадскімі аб'яднаннямі раёна,  газетай «Голас часу»  праведзены шэраг мерапрыемстваў,  прысвечаных  Міжнароднаму дню сям'і.

13 мая адбылася ўрачыстая цырымонія рэгістрацыі шлюбу Веранікі і Аляксандра Зелянко.

“Жениться в мае – век маяться” – сцвярджае старадаўняя руская прымаўка. Верыць у такую прыкмету ці не, вырашаюць самі маладыя. 65 майскіх вяселляў згулялі маларытчане за апошнія 5 гадоў. Псіхолагі сцвярджаюць, што сем'і, якія былі створаны ў маі, больш моцныя.

Два гады назад пазнаёміліся Вераніка і Аляксандр Зелянко. А сёлета ў маі вырашылі згуляць вяселле. І хоць так атрымалася, што дзень заключэння шлюбу выпаў на 13 чысло, ні на якія прыкметы ўвагі не звярталі.

- Будзе сямейнае шчасце ці не, не вырашае месяц года ці “дрэнны” дзень календара. Шчасце залежыць ад дваіх, ад іх пачуццяў, якія трэба захаваць, - мудра разважае Вераніка.

Як і многія іншыя, Вераніка і Аляксандр не аднойчы ўжо былі сведкамі вясельнай цырымоніі. Але цяпер кожнае слова гучала менавіта для іх. І гэта было важным і каштоўным.

У час рэгістрацыі шлюбу маладых чакаў сюрпрыз. Разам з начальнікам аддзела загса райвыканкама Наталляй Камянчук маладых віншавала старшыня раённай арганізацыі ГА “Беларускі фонд міру” Людміла Бурштын. У падарунак новая беларуская сям'я атрымала  кубкі з лічбай 100.

- Дажыць вам у пары да ста гадоў, каб дом быў поўнай сямейнай чашай, - жадала прадстаўнік грамадскага аб'яднання маладым.

На здымку: маладых віншуе старшыня раённай арганізацыі ГА “Беларускі фонд міру” Людміла Бурштын.

“Сям’я, у якой шчаслівы я”

У фотаконкурсе “Сям’я, у якой шчаслівы я”, які арганізавала раённая газета “Голас часу” разам з аддзелам загса Маларыцкага райвыканкама і раённай арганізацыяй грамадскага аб’яднання “Беларускі фонд міру”, падведзены вынікі яшчэ ў двух намінацыях - “Сям’і шчаслівыя імгненні” і “Тата, мама, я – актыўная сям’я”. У Міжнародны дзень сям’і пераможцы фотаконкурсу атрымлівалі заслужаныя прызы. Сям’я Людмілы і Ігара Саўчукоў, якая перамагла ў намінацыі “Тата, мама, я – актыўная сям’я”, прыйшла ў аддзел загса, дзе праводзілася ўзнагароджанне, у поўным складзе – тата, мама і трое дзетак: васьмігадовы Уладзік, сямігадовая Алёна і пяцігадовы Кірыл. Сёлета гэтая пазітыўная і дружная сям’я адзначыць свой 10-гадовы юбілей. Бацькі і дзеці вельмі любяць актыўны адпачынак. Моманты прагулак на ўлонні прыроды і засняла фотакамера. Прыгожы здымак сям’і не мог не пакарыць журы.

Сямейную прагулку адлюстравала і фатаграфія сям’і Марыны і Эдуарда Ганчарукоў. У гэтай сям’і таксама выхоўваецца трое дзетак – дачка Яна і сыны Ілья і Мікалай. Сабрацца ўсім разам, як на фотаздымку, які даслала сям’я на фотаконкурс, атрымліваецца, прызнаецца Марына, далёка не заўжды. Вось і на ўрачыстае ўшанаванне пераможцаў конкурсу прыйсці змаглі толькі мама і васьмігадовы Мікалай.

Як адзначалі ў размове сем’і, якіх і начальнік аддзела загса Наталля Камянчук, і старшыня раённай арганізацыі “Беларускі фонд міру” Людміла Бурштын віншавалі разам і са святам, і з перамогай у фотаконкурсе, што прыемнай з’яўляецца не толькі сама перамога, а тое, што атрымалася магчымасць паўдзельнічаць у падобным конкурсе, падзяліцца сваімі шчаслівымі ігненнямі і пазнаёміцца з іншымі сем’ямі.

На здымку:  у час ушанавання пераможцаў фотаконкурсу.

У Міжнародны дзень сям’і праведзены вечар-сустрэча “Мая сям’я” ў рамках дзейнасці Клуба маладой сям’і. Начальнік аддзела загса райвыканкама Наталля Камянчук выступіла перад маладымі сем’ямі з інфармацыяй на тэму “Дзень сям’і. Гісторыя свята”. Паміж удзельнікамі вечара-сустрэчы адбыўся адкрыты дыялог “Сям’я – аснова грамадства”. У ходзе мерапрыемства прайшлі прэзентацыя сямей “Сямейныя традыцыі” і гульнявая забаўляльная праграма сярод дзяцей.

На здымку: удзельнікі вечара-сустрэчы “Мая сям’я”.

Да Міжнароднага дня сям’і у аддзеле загса  райвыканкама  было таксама запланавана ўшанаванне бацькоў пры зарэгістрацыі нараджэння  дзяцей.

Для маларытчан Валерыя і Таццяны Шульга, якія прыйшлі зарэгістраваць нараджэнне сына Кірыла, які, між іншым, у іх  сям’і ўжо другое дзіця, тая ўрачыстасць, што іх чакала, стала прыемным сюрпрызам. Начальнік аддзела загса Наталля Камянчук шчыра павіншавала тату і маму са шчаслівай для іх падзеяй – папаўненнем сям’і, напомніла, што рэгістрацыя дзіцяці адбываецца ў юбілейны для органаў загса год і ўручыла падарункі і ад аддзела загса, і ад грамадскіх аб’яднанняў “Белая Русь” і “Беларускі фонд міру”, а таксама кодэкс Рэспублікі Беларусь аб шлюбе і сям’і.  Пакуль бацькі атрымлівалі першы і самы важны дакумент – пасведчанне аб нараджэнні дзіцяці, маленькі Кірыл ціхенька пасопваў на руках таты. Вырасціць сына дастойным грамадзянінам – такім быў наказ бацькам. А  маленькаму маларытчаніну ўсе жадалі здароўя і шчасця.

На здымку: сям’я Валерыя і Таццяны Шульга з нованароджаным  сыночкам Кірылам.